Metroda gecikmə yaranıb - SƏRNİŞİNLƏR NARAZIDIR

Bakı metropolitenində qatarların hərəkətində ləngimə yaranıb. "Dərnəgül" stansiyasından "Həzi Aslanova" gedən qatar 6 dəqiqə intervalla hərəkətə başladı. Qatar hər stansiyada 2-3 dəqiqə gözləməklə "Elmlər Akademiyasına" 35 dəqiqəyə çatdı.

Avtosfer.az xəbər verir ki, Xalqlar Dostluğu stansiyasından gələn həmkarım Elmlər Akademiyasına 1 saat 20 dəqiqəyə çatıb. Orda da qatar dəfələrlə stansiyada və tuneldə gözləyib.

Məsələ ilə bağlı Oxu.Az-a açıqlamasında "Bakı Metropoliteni" QSC-nin mətbuat katibi Bəxtiyar Məmmədov qeyd edib ki, hazırda heç bir nasazlıq yoxdur:

"Bakı metropoliteninin xətlərində qatarlarda və stansiyalarda nasazlıq mövcud deyil. Bir sıra stansiyalarda sıxlıq səbəbindən tənzimləmələr sərnişinlərin və hərəkətin təhlükəsizliyi təmin edilməklə və intervallar qorunmaqla aparılır".

Xatırladaq ki, mayın 3-də "Həzi Aslanov" və "Xalqlar dostluğu" stansiyaları istiqamətindəki şəhər şəbəkəsindən Azərbaycan Nəqliyyat və Kommunikasiya Holdinqinin (AZCON) tərkibində fəaliyyət göstərən "Bakı Metropoliteni" QSC-yə gələn yüksəkgərginlikli elektrik xətləri ilə enerjinin verilişində məhdudiyyətlər yaranıb. Nəticədə qatarların hərəkətində qismən gecikmələr müşahidə olunub.

Vüqar