Mingəçevirdə 1 əsrə yaxın yaşı olan ağac aşıb, yol bağlanıb - VİDEO

Mingəçevir şəhərində 1 əsrə yaxın yaşı olan ağac aşıb. Nəticədə evlərə gediş-gəliş yolunu bağlayıb.

Dünən gecə olan külək fəsadsız ötüşməyib.

Nəhəng ağac Mingəçevirdə köhnə turist bazasının giriş qapsının yaxınlığına aşıb. Nəticədə 50-dən artıq məcburi köçkün ailəsinin məskunlaşdığı əraziyə giriş-çıxış bağlanıb.

İrigövdəli qovaq ağacının aşması nəticəsində xəsarət alan olmayıb. Sakinlər bildirib ki, hadisə baş verən ərazidə avtomobil olsa da ciddi zərər görməyib.

Küləyin təsirindən gecə saatlarında aşan irigövdəli ağacı ərazidən götürmək mümkün olmadığından adiyyatı qurumlar texnikalar vasitəsi ilə əraziyə avtomobillərin gediş-gəlişi üçün alternativ yol açıblar. Bununla da köhnə turist bazasına giriş-çıxış bərpa edilib.

Bir əsrə yaxın yaşı olduğu deyilən qovaq ağacı yaxınlıqda olan şam ağaclarından bir neçəsini də zədəliyib. Adiyyatı qurumlar tərəfindən kökündən qopan ağac ərazidən götürülüb.