Musiqi ilə başlayan, qəhrəmanlıqla bitən ömür: Şəhid Xudayar Yusifzadənin həyat hekayəsi - VİDEO

Azərbaycanın igid oğlu, İkinci Qarabağ müharibəsi zamanı şücaəti ilə yanaşı, məlahətli səsi ilə əsgər yoldaşlarını ruhlandıran şəhid Xudayar Yusifzadənin anası Radə Qurbanova onun uşaqlıq illəri və musiqiyə olan sevgisindən danışıb.

Avtosfer.az İTV-yə istinadən xəbər verir ki, onun sözlərinə görə, Xudayarın ailəsi Bərdədə tanınan musiqiçi ailə olub:

"Sovet dövründə ailəmiz musiqi ilə məşğul idi. Demək olar ki, Bərdədə mədəniyyətin qurucularından biri Xudayarın babası - klarnet ifaçısı Yusif kişi olub".

Radə Qurbanova qeyd edib ki, Yusif Qurbanov və Qurbanovlar ailəsi Bərdədə musiqi sahəsində böyük iz qoyublar:

"Xudayar babasının adı ilə Yusifzadə soyadını daşıyır. Yəni Yusifzadələr və Qurbanovlar eyni nəsildəndir. Qardaş-bacı övladlarıdır. Ailədə musiqiçilər çox olublar - biri müğənni, biri skripka ifaçısı, rəhmətlik atası isə məşhur qarmon ifaçısı Müslüm Qurbanov idi".

Şəhidin anası bildirib ki, Xudayar da musiqi təhsili alıb və gənc yaşlarında bu sahədə uğurlar qazanıb:

"Xudayar musiqi məktəbini bitirmişdi. Birinci Muğam Festivalı keçiriləndə Ağcabədidə birinci yerə çıxmışdı. Musiqi karyerası ola bilərdi, amma o, Vətənə xidmət etməyi seçdi. Hərbçi olmaq istəyirdi və bu arzusu üstün gəldi. Amma yenə də ürəyində həm musiqi, həm hərb sevgisi var idi".

Mövzu ilə bağlı daha ətraflı videomaterialı təqdim edirik: