Ödənişli zona PROBLEMİ… “Tıxacı həll edəcək bütün alternativlər tükənib ki?”

Son günlər Bakının bəzi zonalarına ödənişli gediş məsələsi gündəmdədir. Qeyd olunur ki, bu sistem 1 yanvar 2027-ci ildən qüvvəyə minəcək. Bəli, London, Stokholm kimi şəhərlərdə bu praktikadan istifadə olunub. Hətta dəfələrlə bu barədə efirdə də danışmışam. Amma sualım var: Doğrudanmı bizdə tıxacı həll edəcək bütün alternativlər tükənib ki, ən radikal addıma keçirik?

Avtosfer.az xəbər verir ki, bu sualla aidiyyəti qurumlara radio aparıcısı dj Tural Yusifov müraciət edib. O bildirib ki, bu iş də digərləri kimi yarımçıq qalmasa nəticəsi yaxşı ola bilər:

“Daha bir sual yaranır, ödəniş yalnız zonaya daxil olub orada qalana şamil olunacaq, yoxsa tranzitlə keçən sürücülər də pul ödəyəcək?
Məsələn, mənim yolum S.Vurğun küçəsindən Neftçilər prospektinə düşürsə, hər dəfə ödəniş etməli olacam?

Əgər məqsəd dayanıb park etməkdirsə, mənim kimisə götürüb yoluma davam etməyim necə müəyyən ediləcək?

Park mövzusu da ayrı dərddir. Onsuz da şəhər mərkəzində parkinq baha başa gəlir. Mənim buna sözüm yoxdur-çünki mərkəzdə maşın saxlamaq bir növ lyüksdür. Bir az kənarda saxlayıb gəzə-gəzə də gəlmək olar. Amma indi maşınla mərkəzə gəlişin özü də ödənişli olacaq.

Ola bilsin ki, bu sistem 2027-ci ildən işləsin. Amma sual budur:
Yaxşı etmək istədiyimiz yenə əvvəlki kimi yarımçıq qalmasın?”.(tribuna.info)