Polis Ağdaşda məktəblilərin qonağı olub

DİN Mətbuat Xidmətinin Şəki regional qrupundan verilən məlumata görə, Ağdaş şəhər 3 saylı tam orta məktəbdə Rayon Polis Şöbəsinin təşkilatçılığı ilə şagirdlərlə görüş keçirilib. Görüşdə “Narkomaniya ümumbəşəri bəladır” və “Dini radikalizmə qarşı mübarizə” mövzularında gənclərlə maarifləndirici söhbətlər aparılıb. Avtosfer.az-a verilən məlumata görə tədbirdə çıxış edən RPŞ-nin rəisi, polis polkovniki Rasim Mustafayev narkotik vasitələrin zərərləri barəsində məktəblilərə geniş məlumat verib. Yaşadığımız dövrdə ümumbəşəri bəlaya çevrilmiş narkomaniyanın cəmiyyətdə və insanın şəxsi həyatında törədə biləcəyi neqativ hallardan söhbət açan R.Mustafayev bu bəla ilə mübarizə yolları haqqında danışıb.

Şöbə rəisi çıxışında dini radikalizmin səbəbləri və onun fəsadları barədə də geniş məlumat verib. Gənclərin radikal dini cərəyanların təsiri altına düşməməsi üçün bu cür maarifləndirici tədbirlərin mütəmadi keçirilməsinin vacibliyini vurğulayıb.

Sonda məktəbliləri maraqlandıran suallar cavablandırılıb.

Gültən