Qanunda dəyişiklik; erkən evliliklə bağlı qaydalar sərtləşdirilməlidir? – SORĞU – VİDEO

Azərbaycan Respublikasının Nazirlər Kabineti “Gənclər arasında ailənin və nikahın əhəmiyyəti, onun qorunması və möhkəmləndirilməsi məqsədilə erkən nikahın və qohumlar arasında nikahın mənfi nəticələrinə dair maarifləndirmə Qaydası”nda dəyişiklik edib. Avtosfer.az xəbər verir ki, dəyişikliyə əsasən bundan sonra qaydadaki “erkən nikah” anlayışı “erkən evlilik” ifadəsi ilə əvəzlənib. Ötən ildən erkən nikah qaydalarının pozulması ilə bağlı qüvvəyə minən cəza tədbirlərinə baxmayaraq hələdə qanunları müxtəlif yollarla pozan vətəndaşlarımız var. Mütəxəssislərin sözlərinə görə bəzi vətəndaşlar soyad dəyişikliyi və başqa qanunsuz yollarla belə evliliklərə cəhdlər edir. Bəs görəsən paytaxt sakinləri bu barədə nə düşünür? Avtosfer.az-ın Bakıda keçirdiyi sorğuda iştirak edən vətəndaşlar erkən evliliklə bağlı düşüncələrinin neqativ olduğunu bildirib. Sorğuda iştirak edən Müharibə Veteranları Qadınlarına Sosial Yardım" İctimai Birliyinin sədri Radə Abbasın fikrincə bu gün ölkədə övladı dünyaya gəlsin deyə var-dövlətini ortaya qoyan, eləcə də dağılan ailələr var. “Allah sizə övlad verib, siz o övladdan niyə bezirsiniz, 13-14 yaşı olan kimi 30-35 yaşında pedofillərlə niyə evləndirirsiniz o uşağınızın? Bunun adı budur, bunun başqa adı yoxdur, siz uşağınızdan sadəcə olaraq başınızdan eləyirsiniz, siz uşağınızı sadəcə olaraq nəyəsə satırsınız, uşağınız. Qızınızın sizin yanınızda hansısa bir dəyəri olsaydı, siz 14, 13, 15 yaşında, lap 16 yaşında qızınızı 30-35 yaşında kişilərlə, pedofillərlə evləndirib bədbəxt eləməzdiniz. Hər mənada bədbəxt olurlar. Onu boşamasalar belə, o həyatın bütün gözəlliklərindən məhrumdur. Çünki nə ana olmağı anlamır, nə ailə olmağı anlamır. Heç nəyi başa düşmədiyi, bilmədiyi, həyatını yaşamadığı bir halda onu həyatın qaynar qazanına atıb məhv eləmək valideynə yaraşmır, valideyn üçün Allahın ən böyük cəzasıdır."

Sorğudan həmin videonu sizə təqdim edirik.

Türkan Ülvi