Qatarlarda hələ də havalandırma işləmir? – Metropolitendən AÇIQLAMA

Paytaxtda fəaliyyət göstərən avtobuslarda yay mövsümünün başlaması ilə əlaqədar kondisioner sistemləri tam gücü ilə istifadəyə verilsə də, metrodan istfadə edən sərnişin isə, havalandırma və soyutma ilə bağlı problemlərin hələ də tam aradan qaldırılmadığını bildirirlər.
Avtosfer.az xəbər verir ki, xüsusilə isti hava şəraitində metrodan istifadə edən sərnişinlər qatar vaqonlarında və bəzi stansiyalarda havanın kifayət qədər sərin olmamasından narazılıq ediblər. Bəs hazırda metro qatarlarında və stansiyalarda havalandırma və soyutma sistemlərinin işlək vəziyyətdə saxlanılması üçün hansı tədbirlər görülür?
Mövzu ilə bağlı ''Bakı Metropoliteni'' Qapalı Səhmdar Cəmiyyəti Avtosfer.az-a açıqlamasında bildirib ki, Bakı Metropolitenində kondisionerlə təchiz olunmuş qatarlarda soyutma sisteminin işlək vəziyyətdə olması ilə baglı mütəmadi işlər aparılaraq texniki xidmət göstərilir:

"Yeni nəsil qatarlarda kondisioner sistemləri salondaxili hava şəraitindən asılı olaraq, avtomatik rejimdə tənzimlənir. Texniki baxışa daxil olan qatarların kondisionerləri mütəxəssislər tərəfindən diaqnostika olunaraq tam işləkliyi yoxlanılır və bu proses daim nəzarətdə saxlanılır. Əvvəlki nəsil qatarlarda kondisioner sistemi mövcud deyil. Lakin bütün vaqonlar istehsalçı zavod tərəfindən konstruktiv olaraq havalandırma sistemilə təchiz edilib. Hazırda kondisionerlərlə təchiz olunmuş qatarların soyutma sisteminin saz vəziyyətdə saxlanılması ilə bağlı heç bir gecikmə müşahidə edilmir".
Qurum qeyd edib ki, metropoliten xətlərində hərəkətdə olan qatarların hər hansı bir vaqonunun kondisioner sistemində yarana biləcək nasazlıq dərhal qeydiyyata alınır:
“Qatar texniki baxışa göndərilərək diaqnostika olunmaqla bərpa edilir. Həmçinin stansiya və tunellərdə ventilyatorlar işlək vəziyyətdə olmaqla yanaşı, daim nəzarətdə saxlanılır, havalandırma sistemi təsdiq edilmiş mövcud qrafik üzrə fəaliyyətdədir. Hər günün real hava proqnozuna uyğun qaydada ventilyatorların operativ şəkildə tənzimlənməsi diqqət mərkəzində saxlanılır və zəruri bütün tədbirlər görülür".

Fatimə Dadaşova