Qubanın hansı kəndlərinin adının dəyişdirilməsi təklif edilir? - VİDEO

Quba rayonunda bir neçə yaşayış məntəqəsinin adlarının dəyişdirilməsi təklif edilib. Bu barədə Milli Məclisin Toponimiya komissiyasının sədr müavini Musa Quliyev məlumat verib.

Belə ki, rayonun Vladimirovka kəndinin adının Elbir, Alekseyevka kəndinin adının Çinarlı, Timiryazev kəndinin adının isə Bəhrəli ilə dəyişdirilməsi təklif olunur.

"İllərdir Timiryazev kəndində yaşayırıq. Kəndimizin adını çəkəndə xəcalət çəkirik. Başqa yerlərə gedəndə isə adama gülürlər, "o nə deməkdir?" deyirlər. Qəribə gəlir hamıya", - Timiryazev sakini Baku TV-yə bildirib.

Vladimirovka bələdiyyəsinin sədr müavini Bəşir Qəhrəmanov da öz təklifini verib: "Mən də təklif etmişəm ki, kəndimizin adı Azərbaycanla əlaqəli bir adla əvəz olunsun. "Elbir" çox gözəl addır. Çünki bizim kənddə hər bir millətin nümayəndəsi yaşayır: ləzgilər, türklər, xınalıqlar, tatlar var. Buna görə də bu ad çox yerinə düşər".

Qeyd edək ki, Quba rayonunun üç kəndinin adının dəyişdirilməsi ilə bağlı təklif Milli Məclisin Toponimiya komissiyasının iclasında dəstəklənib və məqsədəuyğun hesab edilib. Bununla əlaqədar müvafiq qanun layihəsi hazırlanaraq Milli Məclisin aidiyyəti komitələrinin müzakirəsinə çıxarılacaq.