“Qurtuluş 93”ün yamaqlı yolları sürücüləri təngə gətirib – Yığılan pullar hara sərf olunur? - VİDEO

Abşeron rayonu, Masazır qəsəbəsində yerləşən “Qurtuluş 93” yaşayış kompleksində yolların vəziyyəti sakinlərin narazılığına səbəb olub.

Bu barədə izləyicilərdən biri Avtosfer.az-ın “Whatsapp” ünvanına videomaterial göndərərək ərazidəki problemlə bağlı məlumat verib. Kadrlardan görünür ki, kompleksdaxili yollarda çoxsaylı çuxurlar yaranıb, bəzi hissələr isə qazıldıqdan sonra asfalt örtüyü ilə bərpa edilməyib. Yamaqlı və yararsız vəziyyətdə olan yollar sürücülərin hərəkətini çətinləşdirir.

Şikayətçinin sözlərinə görə, yolun bərbad vəziyyətdə olması avtomobillərin ehtiyat hissələrinə ziyan vurur və sürücülər üçün əlavə xərc yaradır. Görüntülərdən də aydın görünür ki, yol örtüyü ciddi şəkildə aşınıb, müxtəlif hissələrdə çökəklik və dərin çuxurlar əmələ gəlib.

Şikayətçinin iddiasına əsasən, yaşayış kompleksində 100-dən çox bina yerləşir və sakinlərdən aylıq olaraq mənzilin kvadratına uyğun 15-30 manat arası ödəniş yığılır. Buna baxmayaraq, kompleksin yol infrastrukturu və digər kommunal sahələrinin vəziyyətinin qənaətbəxş olmadığı bildirilir.

Sakinlər aidiyyəti qurumlardan yolların əsaslı şəkildə təmir olunmasını və problemin qısa müddətdə həllini tələb edirlər.

Nərmin