Soyğunçular çəkic və silahla “Lexus”a hücum etdi: Sürücünü yaralayıb 26 mini apardılar 

Moskvada “Lexus”dan 1 milyon rubl (26300 manat) oğurlanıb. Avtosfer.az Rusiya mətbuatına istinadən xəbər verir ki, insident sentyabrın 12-si, Moskva Dairəvi Avtomobil Yolu ilə Novoryazansk  şosesinin kəsişməsində baş verib. Bu barədə əyalət üzrə DİN mətbuat xidmətindən məlumat verilib. Məlumata görə, 4 nəfər silahlı şəxs “Lexus”a yaxınlaşaraq əvvəlcə çəkiclə arxa yan şüşəsini qırıblar. Ardınca sürücünün üzünə gözyaşardıcı qaz püskürdərək ayağına bir əl silahdan atəş açıblar. Cinayətkarlar bundan sonra içərisində şəxsi sənədlərin və 1 milyon rubldan artıq pul olan çantanı götürərək qaçıblar.

Odlu silahdan açılan atəş nəticəsində budundan xəsarət alan sürücü xəstəxanaya yerləşdirilib.

Hadisə ilə bağlı cinayət işi açılıb. Qaçan şəxslərin axtarışları davam etdirilir.

Namiq Musayev