Sumqayıtda mikroavtobus qəzasında zərərçəkənlər məhkəməyə məcburi gətiriləcək

Bakı Ağır Cinayətlər Məhkəməsində Sumqayıtda ölümlə nəticələnən yol-nəqliyyat hadisəsi törətməkdə təqsirləndirilən Qabil Məmmədovun cinayət işi üzrə məhkəmə iclası keçirilib. Avtosfer.az-ın “Report”a istinadən xəbərinə görə, hakim İlham Mahmudovun sədrliyi ilə keçirilən prosesdə elan edilib ki, iş üzrə 18 zərərçəkmiş şəxs var. Zərərçəkmiş şəxlərdən beş nəfəri dindirilməyib. Bildirilib ki, onlar prosesə dəvət edilsələr də, iştirak etmirlər. Hakim zərərçəkmiş şəxslərin məcburi gətirilməsi barədə qərar çıxarıb.

Proses oktyabrın 3-də davam edəcək.

Qeyd edək ki, hadisə ötən il sentyabrın 30-da saat 07:30 radələrində Bakı-Quba-Dağıstan sərhədi yolunun Sumqayıt şəhəri ərazisindən keçən hissəsində Rövşən Həsənovun idarə etdiyi “Mercedes Benz 208 D” markalı, 01-BP-806 dövlət qeydiyyat nişanlı mikroavtobusla Qabil Məmmədovun idarə etdiyi “Mersedes Benz 4140” markalı, 90-CT-969 dövlət qeydiyyat nişanlı yük avtomobili toqquşub, nəticədə mikroavtobusun sürücüsü R.Həsənov, həmin mikroavtobusun sərnişini, təqribən 60-65 yaşlarında naməlum qadın aldıqları xəsarətlərdən hadisə yerində, sərnişinlər Raisa Rzayeva və Tamara İsmayılova isə Sumqayıt şəhər Təcili Tibbi Yardım Xəstəxanasında vəfat edib.

Mikroavtobusda olan digər 13 sərnişin müxtəlif dərəcəli bədən xəsarətlərı ilə Sumqayıt şəhər Təcili Tibbi Yardım Xəstəxanasının reanimasiya şöbəsinə yerləşdiriliblər.

Fakta görə Daxili İşlər Nazirliyinin Baş İstintaq və Təhqiqat İdarəsinin yol nəqliyyat hadisələrinə dair işlər üzrə istintaq və təhqiqat şöbəsində Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.

Hadisə ilə bağlı Q.Məmmədova Cinayət Məcəlləsinin müvafiq maddəsi ilə ittiham irəli sürülüb.