Suraxanıda moped, skuter və motosiklet sürənlərlə bağlı tədbir keçirildi - VİDEO

Suraxanı rayon Polis İdarəsinin Dövlət Yol Polisi Şöbəsinin əməkdaşları rayon ərazisində maarifləndirici tədbir keçirib.

Avtosfer.az xəbər verir ki, tədbir velosiped, skuter və moped sürücülərinə qarşı profilaktik xarakter daşıyır. Tədbirdə iştirak edən Bakı şəhər Dövlət Yol Polisi İdarəsinin bölmə rəisi, polis mayoru Toğrul Nəsirli saxlanılan sürücülərə yol hərəkəti qaydalarının tələblərini izah edib, təhlükəsizlik qaydalarına əməl edilməsinin vacibliyini diqqətə çatdırıb.

Tədbir zamanı dövlət qeydiyyat nişanını çirkli saxlayan, cərimələri ödəməyən moped və motosiklet sürücüləri aşkarlanıb. Onların barəsində qanunamüvafiq tədbirlər görülüb. Skuter və velosiped sürücüləri ilə isə yol hərəkəti qaydalarına dair təbliğat xarakterli söhbət aparılıb.

Yol polisinin keçirdiyi maarifləndirici tədbirdə iştirak edən nəqliyyat eksperti Elməddin Muradlı bildirib ki, ərazidə olarkən nömrəsiz, dəbilqəsiz moped, motosiklet və velosiped idarə edənlər yol polisi əməkdaşlarını görən kimi ara məhəllələrə girib gözdən itirlər. Nəqliyyat vasitəsinin qeydiyyat nişanı olmadıqda, onları sürən adamlar da bilirlər ki, polisdən qaçmaq mümkündür və qaçmağı da bacarırlar. Ekspert yaranmış vəziyyətlə bağlı nömrəsiz moped və motosiklet sürənlərin valideynlərinə çağırış edib. O vurğulayıb ki, valdieynlər övladlarının nömrəsiz moped və motosiklet sürmələrinə mane olmalıdırlar, çünki həmin şəxslər ölümə gedirlər.

Təhlikəsizliyin gücləndirilməsi məqsədilə bu cür tədbirlər davam etdiriləcək.

Səfər