Suriya ordusu Latakiyada silahlıların iki dronunu vurub

Suriya hərbçiləri Latakiya vilayətinin Koban yaşayış məntəqəsində silahlıların buraxdığı iki pilotsuz uçuş aparatını məhv edib. Avtosfer.az-ın Trend-ə istinadən məlumatına görə, bu barədə brifinq zamanı Suriyada düşmən tərəflərin barışdırılması üzrə Rusiya Mərkəzinin rəhbəri general-mayor Aleksey Bakin bildirib.

A.Bakin deyib: "Hərbçilərin cənub-qərb istiqamətdə buraxdığı iki pilotsuz uçuş aparatı Suriya Ərəb Respublikası silahlı qüvvələrinin bölmələri tərəfindən Latakiya əyalətinin Koban yaşayış məntəqəsi ərazisində vurulub".

Bakin qeyd edib ki, İdlib de-eskalasiya zonasının ərazisində qanunsuz silahlı dəstələr tərəfindən hərbi əməliyyatların dayandırılması rejiminin pozulması davam edir. Latakiya, İdlib və Hama əyalətlərindəki 15 yaşayış məntəqəsinin atəşə tutulduğu qeyd edilib.