Sürücüsüz avtomobil sektorunda yenilik; Yaponiya şrikətləri istehsalı artırır - RƏSMİ

Yaponiya 2030-cu ilə qədər avtomobil sənayesində köklü dəyişikliklərə səbəb ola biləcək yeni strategiya ilə diqqət çəkir.

Avtosfer.az xəbər verir ki, Yaponiya hökuməti ölkənin texnoloji gələcəyini təmin etmək məqsədilə genişmiqyaslı investisiya planı açıqlayıb. Strategiyanın əsas hədəflərindən biri qlobal avtonom avtomobil bazarında payı artırmaq və “şaquli süni intellekt” ekosistemini formalaşdırmaqdır.

Məlumata görə, Yaponiya hazırda qlobal avtomobil bazarında təxminən 26 faiz paya sahibdir və bu göstəricini avtonom sürücülük texnologiyalarının inkişafı hesabına 30 faizə çatdırmağı planlaşdırır. Bu çərçivədə sürücü müdaxiləsi tələb etməyən 4-cü səviyyəli avtonom avtomobillərin 2027-ci maliyyə ilinə qədər bazara çıxarılması nəzərdə tutulur.

Ölkənin aparıcı avtomobil istehsalçılarından olan Nissan isə 2030-cu illərin əvvəllərinə qədər modellərinin 90 faizini süni intellektlə işləyən muxtar sistemlərlə təchiz etməyi hədəfləyir.

Strategiyanın diqqət çəkən digər istiqaməti isə “şaquli süni intellekt” yanaşmasıdır. Ümumi təyinatlı süni intellektdən fərqli olaraq, bu model konkret sahələr üzrə ixtisaslaşmış həllərin hazırlanmasını nəzərdə tutur. Yaponiya bu istiqamətdə gəmiqayırma, materialşünaslıq və sənaye istehsalı kimi sahələrdə “agentlik süni intellekt” sistemlərini tətbiq etməyi planlaşdırır.

Bundan əlavə, plan çərçivəsində qlobal infrastruktur üçün vacib olan sualtı kabel sektoruna da ciddi investisiyalar nəzərdə tutulur. Məqsəd 2030-cu ilə qədər bu sahədə süni intellektin payını 20 faizdən 35 faizə yüksəltmək və kabel çəkən gəmilərin sayını artırmaqdır.

Enerji məsələsi də strategiyanın əsas hissələrindən biridir. Süni intellekt və məlumat mərkəzlərinin artan enerji tələbatını qarşılamaq üçün Yaponiya hökuməti yüksək səmərəli LNG qaz turbinlərinə böyük həcmdə investisiya yatırmağı planlaşdırır. Bu çərçivədə LNG “keçid yanacağı” kimi qiymətləndirilir və bərpa olunan enerjiyə keçid prosesində mühüm rol oynayır.

Eyni zamanda, sıfır karbon emissiyası hədəflərinə uyğun olaraq hidrogen-LNG qarışığı ilə işləyən turbin texnologiyalarının inkişafı və Asiya bazarına ixracı da nəzərdə tutulur.

Mütəxəssislərin fikrincə, Yaponiya bu strategiya ilə yalnız iqtisadi artımı deyil, həm də qlobal texnoloji rəqabətdə mövqeyini gücləndirməyi hədəfləyir. Planın uğurla həyata keçirilməsi ölkəni yaxın onillikdə həm avtomobil sənayesində, həm də süni intellekt sahəsində aparıcı güclərdən birinə çevirə bilər.

Eltac Zülfüqaroğlu