Təyyarə bileti qiymətinə karqo xidməti: ABŞ-yə poçt göndərişləri nə zaman bərpa olunacaq?

"Mən ABŞ-yə kiçik bağlamalar yollayırdım, yalnız dövlət poçt xidməti sərf edirdi. Avqust ayından isə Azərbaycandan göndərişlər dayandırılıb. "Azərpoçt"un 65 manata göndərdiyi bağlamanı özəl karqo şirkətləri az qala təyyarə bileti qiymətinə - 600 manata çatdırırlar".

Avtosfer.az "Qafqazinfo"ya istinadən xəbər verir ki, bu tip şikayətləri sosial şəbəkədə paylaşan vətəndaşlar özəl karqo şirkətlərinin maddi baxımdan sərfəli olmadığını, aylardır dövlət poçt xidmətinin bərpa olunacağı günü gözlədiklərini deyirlər.

Onların iddiasına görə, ABŞ tərəfi yeni poçt tarifləri tətbiq etməyə başladığından ölkəmiz poçt göndərişini üç aydır ki, dayandırıb.

Bu məqamda sual ortaya çıxır: Bəs Azərbaycandan ABŞ-yə poçt göndərişləri bərpa olunacaqmı? Hazırda bununla bağlı hansı işlər görülür?

"Azərpoçt" MMC-dən məsələyə münasibət bildirilib.

"29 avqust 2025-ci il tarixindən Amerika Birləşmiş Ştatlarına daxil olan bütün mal tərkibli poçt göndərişlərinə dəyərindən asılı olmayaraq gömrük rüsumu tətbiq edilir və bu rüsum bağlama göndərən ölkədə əvvəlcədən ödənilməlidir. Lakin rüsumların yeni qaydada hesablanması və ödənilməsi mexanizmi hələlik mövcud olmadığı üçün "Azərpoçt" MMC-dən asılı olmayan səbəblərə görə poçt göndərişlərinin daşınması hələ ki mümkün deyil. Sözügedən mexanizmin Ümumdünya Poçt İttifaqının (ÜPİ) Gömrük Bəyannamə Sistemi (CDS) üzərindən tətbiqi istiqamətində müvafiq işlər aparılır", - açıqlamada deyilir.

Qurumdan, həmçinin bildirilib ki, sözügedən məsələ ilə əlaqədar yenilik olduğu təqdirdə "Azərpoçt" MMC tərəfindən ictimaiyyətə məlumat veriləcək.