Ticarət mərkəzi yaxınlığında atışma: polis 4 yaralı aşkarladı

ABŞ-ın Texas ştatında ticarət mərkəzinin yaxınlığında baş verən atışma nəticəsində 4 nəfər yaralanıb. Avtosfer.az xəbər verir ki, insident San-Antonio şəhərində qeydə alınıb. Bu barədə məlumat yerli polisin “Twitter” səhifəsində yayımlanıb.

Məlumata görə, ötən gün axşam polisə “South Park Mall” ticarət mərkəzinin yaxınlığında atışma ilə bağlı xəbər daxil olub. Deyilən ünvana gedən asayiş keşikçiləri, hadisə yerində odlu silahdan açılan atəş nəticəsində yaralanan 4 nəfəri aşkarlayıb.  

Şahidlər, atışma törədən şəxslərin 3 nəfər olduğunu bildirib. Şübhəlilər cinayət yerindən avtomobillə qaçaraq gizləniblər.

Yaralılar xəstəxanaya çatdırılıb. Onlardan ikisinin vəziyyəti ağır olduğu deyilir.

Hazırda şübhəlilərin axtarışlarına başlanılıb, təhqiqatlar aparılır.

Namiq Musayev