Tovuzda 22 yaşlı gəncin öldüyü qəza ilə bağlı cinayət işi başlanılıb

Tovuz rayonunda ölümlə nəticələnən yol qəzası ilə bağlı cinayət işi başlanılıb. Avtosfer.az-ın “Report”a istinadən xəbərinə görə, hadisə noyabrın 27-də rayonun Əlimərdanlı kəndində baş verib.

Belə ki, Tovuz rayon sakini, 1985-ci il təvəllüdlü Rauf Muradov atasına məxsus “Mercedes-Benz” markalı avtomobillə hərəkətdə olan zaman idarəetməni itirib və yolun kənarındakı işıq dirəyinə çırpılıb.

Nəticədə avtomobildə olan sərnişin, rayon sakini, 1997-ci il təvəllüdlü Əhliman Aliyev hadisə yerində ölüb. Sürücü R.Muradov isə sağ bud sümüyünün yerdəyişməli sınığı xəsarəti alıb.

Faktla bağlı Tovuz Rayon Polis Şöbəsinin istintaq bölməsində Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozmam, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanılıb, istintaq aparılır.