Türkiyədən İranla bağlı KRİTİK QƏRAR

Türk Hava Yolları (THY) İrana uçuşları martın 20-nə qədər dayandırıb.

Avtosfer.az xəbər verir ki, bu barədə Türkiyənin nəqliyyat və infrastruktur naziri Abdulkadir Uraloğlu sosial media hesabında məlumat verib.

"Bu gündən etibarən THY, "AJet", "Pegasus" və "SunExpress" tərəfindən həyata keçirilən İran, İraq, Suriya, Livan və İordaniyaya uçuşlar martın 9-u günün sonuna qədər dayandırılıb. Bundan əlavə, "Pegasus" martın 12-nə, THY isə martın 20-nə qədər İrana uçuşları cədvəlindən çıxarıb.

Hələb istisna olmaqla, İran, İsrail, İraq, Qətər, Bəhreyn, Küveyt və Suriyanın hava məkanı bağlı qalır. Oman, İordaniya və Səudiyyə Ərəbistanında qismən uçuşlar davam edir, BƏƏ-də isə hava nəqliyyatı nəzarət altındadır və məhdudlaşdırılır", - deyə nazir bildirib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.