"Universitetləri, hətta paytaxtı köçürmək lazımdır" - Deputat

Bakıdakı tıxacın həll yolları ilə bağlı ictimai rəyin nəzərə alındığını düşünmürəm. Çünki dəfələrlə təkliflər verilib, amma bu sahədə bir az qeyri-peşəkar yanaşma mövcuddur”.

Bunu millət vəkili Fazil Mustafa deyib. O bildirib ki, sözügedən problemlərin həlli ilə bağlı ictimaiyyətin fikri nəzərə alınmır:

“Amma əslində dinləmək lazımdır, bu sahəyə aid mütəxəssisləri toplamaq lazımdır. Ağıl ağıldan üstündür, cəmiyyətdən fikir almaq lazımdır. Yoxsa bu gün bir zolaq artırdın, avtobus getdi, onunla məsələni həll etdin, amma digər avtomobillər yenə də tıxacda qalır. Metrostansiyaların nə vaxt artırılacağı açıq şəkildə göstərilməlidir. Yəni bunlar hamısı ictimaiyyətlə müzakirə olunmalıdır. Əks halda tıxac məsələsini hansısa 1-2 məmurun düşüncəsi ilə həll etmək inandırıcı gəlmir. Ona görə bu barədə bir təklif verməyi də mənasız hesab edirəm. Əlbəttə, universitetləri, lazım gələrsə paytaxtı köçürmək lazımdır. Tıxac iqtisadiyyata böyük zərər vurur, çətinliklər yaradır, vaxt itkisinə səbəb olur”.(demokrat.az)