Velosiped zolaqlarında təhlükənin qarşısı necə alınmalıdır? – TƏKLİF

Velosiped zolaqları ilə avtobus dayanacaqlarının kəsişdiyi hissələrdə təhlükəsizlik məsələsi yenidən gündəmə gəlib. Mütəxəssislər hesab edirlər ki, bu cür məkanlarda düzgün layihələndirmə aparılmadıqda piyadalar və mikromobillik istifadəçiləri üçün qəza riski artır.

Avtosfer.az xəbər verir ki, bununla bağlı "Bakı Gündəliyi" səhifəsində paylaşım edilib.

Paylaşımda bildirilir ki, avtobus dayanacaqda sərnişinləri mindirib-endirərkən bəzi velosiped və elektrikli skuter sürücüləri hərəkəti dayandırmadan davam etdirirlər. Bu isə avtobusdan enən və ya minən sərnişinlərlə toqquşma ehtimalını artırır və ciddi təhlükəsizlik riski yaradır.

Dünyanın müxtəlif şəhərlərində bu problemin qarşısını almaq üçün fərqli şəhərsalma həlləri tətbiq edilir. Bunlara velosiped zolağının dayanacaq platformasının arxa hissəsindən keçirilməsi, piyadalar üçün ayrıca keçid sahələrinin yaradılması, sürətin məhdudlaşdırılması və xüsusi xəbərdaredici nişanlanmalar daxildir.

Paylaşımda vurğulanır ki, son şəkillərdə bu problemin həlli üçün istifadə olunan müxtəlif layihələndirmə nümunələri təqdim edilib. Məqsəd həm ictimai nəqliyyatdan istifadə edən sərnişinlərin, həm də velosiped və skuter sürücülərinin təhlükəsizliyini təmin etməkdir.

Eltac Zülfüqaroğlu