Xəzərdə konteyner daşımalarının həcmi artacaq? – Ekspertdən AÇIQLAMA

Xəzər dənizində konteyner daşımalarının imkanlarının genişləndirilməsi istiqamətində yeni layihə həyata keçirilir. Bakı Gəmiqayırma Zavodunda hər biri 780 TEU tutumuna malik iki yeni nəsil konteyner gəmisinin tikintisinə başlanılıb. Yeni gəmilərin istismara verilməsi regionda yükdaşıma imkanlarının artırılmasına töhfə verə bilər.

Avtosfer.az xəbər verir ki, bu barədə nəqliyyat eksperti Rauf Ağamirzəyev məlumat verib.

Ekspertin sözlərinə görə, hazırda Xəzər dənizində fəaliyyət göstərən “Berkut” (Qartal), “Barıs” (Bəbir) və “Sünkar” (Şahin) gəmilərinin hər biri 350 TEU konteyner tutumuna malikdir. Yeni tikiləcək gəmilərin tutumu isə mövcud gəmilərlə müqayisədə 2,23 dəfə çox olacaq.

Layihə AZCON Holding və AD Ports Group arasında əməkdaşlıq çərçivəsində həyata keçirilir. Artıq ilk gəminin kilqoyma mərasimi keçirilib. Hər iki gəminin 2028-ci ilədək təhvil verilməsi nəzərdə tutulur.

Rauf Ağamirzəyev qeyd edib ki, yeni konteyner gəmilərinin inşası Orta Dəhlizin inkişafı, Xəzər dənizində yükdaşıma imkanlarının genişləndirilməsi və Azərbaycanın regional logistika mərkəzi kimi mövqeyinin möhkəmləndirilməsi baxımından əhəmiyyətlidir.

Qeyd edək ki, TEU konteyner daşımalarında istifadə olunan ölçü vahididir və 20 futluq standart konteynerə bərabərdir.

Eltac Zülfüqaroğlu