Xıdırlıda drenaj sistemi düzgün qurulmayıb, ev su altında qalır – ŞİKAYƏT - VİDEO

Ağdam rayonunun Xıdırlı kəndinə köç edən vətəndaş yeni tikilmiş fərdi evində yaranan problemlə bağlı aidiyyəti qurumlara müraciət edib.

Avtosfer.az xəbər verir ki, sosial şəbəkədə paylaşım edən sakin dövlət tərəfindən yaradılan şərait nəticəsində yeni evə köçdüyünü bildirsə də, həyətdə və evin ətrafında drenaj sisteminin düzgün qurulmamasından şikayətlənib. Onun sözlərinə görə, yağışlı havalarda su bünövrəyə dolur, nəticədə evdə rütubət yaranır və tikiliyə ziyan dəyir.
Vətəndaş iddia edir ki, məsələ ilə bağlı Xıdırlı kəndi üzrə təyin olunmuş – Şünasib, Cəlil, Bəhruz, Ziya və Rafət adlı məsul şəxslərə dəfələrlə müraciət etsə də, indiyədək heç bir tədbir görülməyib.

Sakin qeyd edir ki, məsul şəxslərin laqeydliyi ucbatından dövlət vəsaiti hesabına inşa olunmuş ev suyun təsiri altında qalaraq zərər görür. O, problemin araşdırılması və drenaj sistemindəki nasazlığın qısa müddətdə aradan qaldırılması üçün aidiyyəti qurumlardan kömək istəyib.

Eltac Zülfüqaroğlu