Xırdalanda yol “çuxur bataqlığı”na çevrilib: Sürücülər hərəkət edə bilmir - VİDEO

Abşeron rayonu, Xırdalan şəhəri, Heydər Əliyev prospektində yolun asfalt örtüyü yararsız vəziyyətdədir.

Avtosfer.az-ın məlumatına görə, bununla bağlı izləyicilərdən biri redaksiyanın “Instagram” səhifəsinə videogörüntülər göndərib. Kadrlardan aydın olur ki, yolun asfalt qatı aşınıb, nəticədə ərazidə dərin çuxurlar əmələ gəlib.

Mövcud vəziyyət sürücülərin hərəkətini çətinləşdirir. Bildirilir ki, hətta aşağı sürətlə hərəkət zamanı belə çökəkliklər nəqliyyat vasitələrinə ziyan vuracaq qədər dərindir. Çuxurların sayının çoxluğu isə manevr imkanlarını məhdudlaşdırır və sürücülərin onlardan yayınmasını çətinləşdirir.

Eyni zamanda, əlverişsiz hava şəraitində yolun vəziyyəti daha da ağırlaşır və hərəkət iştirakçıları üçün əlavə çətinliklər yaradır.

Qeyd olunur ki, sözügedən problem uzun müddətdir davam edir.

Nərmin