Yağış sularının idarə olunmasında əsas problem nədir? – AÇIQLAMA

Yağış sularının idarə olunması üçün yeni kollektorların tikintisi ilə yanaşı, mövcud infrastrukturun müntəzəm təmizlənməsi və texniki vəziyyətinə nəzarət də vacibdir. Suqəbuledici barmaqlıqların yarpaq, budaq və məişət tullantıları ilə tutulması yağış sularının axınını məhdudlaşdıraraq yollarda su yığılması riskini artıra bilər.

Avtosfer.az xəbər verir ki, nəqliyyat eksperti Rauf Ağamirzəyev bildirib ki, mövcud infrastrukturun düzgün istismarının əhəmiyyətinə diqqət çəkib.

Ekspert bildirib ki, cəmi 11 il əvvəl istifadəyə verilmiş yolda yağış sularını qəbul edən barmaqlıqların tullantılarla dolması infrastrukturun saxlanılması və texniki xidmət məsələlərinin aktuallığını göstərir.

Yeni kollektorların inşası vacib olsa da, mövcud sistemlərin müntəzəm təmizlənməsi və texniki baxımdan saz vəziyyətdə saxlanılması da diqqətdən kənarda qalmamalıdır. Suqəbuledici qurğuların və suötürücü xətlərin tutulması yağış sularının hərəkətini çətinləşdirir, sistemin digər hissələrinə əlavə yük yaradır və zəncirvari problemlərə səbəb ola bilər.

Rauf Ağamirzəyev qeyd edib ki, kommunal xidmətlərin əməkdaşları üçün müvafiq təlimlər təşkil edilməli, təmizlik və texniki xidmət işləri isə yalnız problem yarandıqdan sonra deyil, əvvəlcədən hazırlanmış qrafik əsasında həyata keçirilməlidir.

İnfrastrukturun səmərəliliyi yalnız onun tikintisinə sərf olunan vəsaitlə və yaradılan imkanlarla deyil, həm də uzunmüddətli istismarının nə dərəcədə düzgün təşkil edilməsi ilə ölçülür.

Eltac Zülfüqaroğlu