Yevlaxda evlərdən oğurluq edən şəxsin məhkəməsi başlayır

Yevlax rayonunda oğurluq hadisələri törətməkdə təqsirləndirilən Rahib Dünyamalının cinayət işi üzrə ibtidai istintaq başa çatıb. Avtosfer.az-ın "Report"a istinadən xəbərinə görə, cinayət işi baxılması üçün Yevlax Rayon Məhkəməsinə göndərilib. Hakim Toğrul Əliyevin icraatında olan iş üzrə hazırlıq iclası yaxın günlərdə keçiriləcək.

Qeyd edək ki, bir qrup Yevlax rayon sakini müxtəlif vaxtlarda rayon polis şöbəsinə ərizə ilə müraciət edərək onlara məxsus evlərdən üç samovarın və qızıl əşyalarının oğurlandığı barədə məlumat verib.

Məlumatla əlaqədar polis əməkdaşları tərəfindən müvafiq tədbirlər görülüb. Keçirilmiş əməliyyat-axtarış tədbirləri nəticəsində oğurluğu törətməkdə şübhəli bilinən rayon sakini Rahib Dünyamalı iyul ayında saxlanılıb.

Onun 650 manat dəyərində samovar və 630 manat dəyərində qızıl əşyaları oğurlayaraq vətəndaşlara ziyan vurduğu müəyyən edilib.

Faktla bağlı Yevlax Rayon Polis Şöbəsində cinayət işi başlanılıb, R.Dünyamalıya Cinayət Məcəlləsinin 177.2.2-ci (təkrar oğurluq) maddəsi ilə ittiham verilib.