Yevlaxda ölümlə nəticələnmiş qəza törədən sürücünün məhkəməsi başlayır

Yevlax rayonunda ölümlə nəticələnən yol-nəqliyyat hadisəsi törətməkdə təqsirləndirilən Babək Qədirlinin cinayət işi üzrə ibtidai istintaq başa çatıb. Avtosfer.az "Report"a istinadən xəbərinə görə, cinayət işi baxılması üçün Şəki Ağır Cinayətlər Məhkəməsinə göndərilib. Hakim Bilal Məmmədovun icraatında olan iş üzrə hazırlıq iclası oktyabrın 15-ə təyin edilib.

Qeyd edək ki, hadisə bu il iyunun 15-də Yevlax rayonunun Qoyunbinəsi kəndi ərazisində baş verib. "VAZ" markalı minik avtomobili ilə "QAZel" markalı yük avtomobili toqquşub.

Nəticədə 3 xəsarət alıb, bir nəfər isə (1988-ci il təvəllüdlü Xəlilov Elşən Yaşar oğlu) dünyasını dəyişib.

B.Qədirliyə Cinayət Məcəlləsinin 263-cü 1.3 (yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan edilib.