“20 Yanvar”da qayda pozan sürücü və piyada mübahisə etdi: “İkimiz də maşın yolundayıq” - VİDEO

Qəzaların bir qisminin motosiklet və mopedlərin iştirakıyla baş verməsi təsadüfi deyil. Təəssüflə qeyd edək ki, motosiklet və moped sürücüləri arasında yol-hərəkəti qaydalarına əməl etməyənlər kifayət qədərdir. Xüsusilə zolaqla deyil, nəqliyyat vasitələrinin ortasıyla, yaxud kənarıyla hərəkət edən moto sürücülər təhlükə yaradırlar.

Paytaxtın Yasamal rayonu, Həsən bəy Zərdabi küçəsində də qayda pozan motosiklet sürücüsü özünü videoya çəkərək sosial şəbəkədə paylaşıb. Belə ki, moto sürücüylə ondan geri qalmayaraq özünü təhlükəyə atan piyada arasında mübahisə yaranıb.

Avtosfer.az-ın məlumatına görə, hadisə bir neçə gün əvvəl günorta saatlarında “20 Yanvar” metrosu yaxınlığında qeydə alınıb. Tıxacda gözləmək istəməyən motosiklet sürücüsü zolaqdan kənar hərəkət edib. Bu zaman o, yolun hərəkət hissəsiylə gedən piyadayla üz-üzə qalıb. İşin ən gülməli məqamı isə onların bir-birinə irad bildirməsi olub. Sürücünün “Dayı, sən hardasan?” sualına, piyada “Bura motosiklet yeridir?” cavabını verib. Daha sonra sürücü “İkimiz də maşın yolundayıq”
deyərək gülüb və ərazidən uzaqlaşıb.

Nərmin