Bakıda yol nişanının qarşısını ağacların kəsməsi təhlükə yaradır - VİDEO

Bakının Yasamal rayonunun ərazisində yol nişanının görünməz olması həm sürücülərin, həm piyadaların narazılığına səbəb olub.

Avtosfer.az xəbər verir ki, bu barədə Oxu.Az-a müraciət daxil olub.

Bildirilib ki, Şəfayət Mehdiyev və Landau küçələrinin kəsişməsindəki ağaclar piyadalar üçün nəzərdə tutulan yol nişanını görünməz edib.

"Bu yolda avtomobillər intensiv hərəkət edir. Piyadalar üçün nəzərdə tutulan yol nişanı ağacların arasında görünməz olduğu üçün sürücülər piyadalara yol vermirlər. Günün qaranlıq saatlarında yerdəki xətlər də görünməz olur. Nişanın görünməz olması həm sürücülər, həm piyadalar üçün real təhlükə yaradır", - deyə müraciətdə bildirilib.

Bakı Şəhər Yaşıllaşdırma Təsərrüfatı Birliyindən bildirilib ki, nişanların qarşısı budaqlarla örtüldüyü zaman quruma həmin nişanın balansdaşıyıcısı tərəfindən rəsmi müraciət daxil olmalıdır:

"Lakin buna baxmayaraq, birliyin əməkdaşları tərəfindən mütəmadi olaraq monitorinqlər həyata keçirilir və belə hallar aşkarlandıqda aradan qaldırılır. Sözügedən əraziyə də baxış keçiriləcək və həmin ağacların aqrotexniki qaydalara uyğun budanması mümkün olduğu təqdirdə məsələ öz həllini tapacaq", - deyə məlumatda bildirilib.