Heyvanlardan qazanc əldə edən “Bio Garden”də itlər acınacaqlı vəziyyətdədir - VİDEO

Şəki şəhərinin Öryət kəndində yerləşən “Bio Garden” eko-aqro turizm məkanında saxlanılan itlərin vəziyyəti narazılığa səbəb olub.

Avtosfer.az xəbər verir ki, əraziyə səfər edən vətəndaşlardan biri itlərin saxlanma şəraitini gördükdən sonra çəkiliş apararaq görüntüləri qeydə alıb.

Kadrlardan görünür ki, “Husky”, “Golden” və digər cinslərə aid itlər dar qəfəslərdə, daşlıq ərazidə saxlanılır. Heyvanların baxımsız vəziyyətdə olduğu, bəzilərinin halsız göründüyü diqqət çəkir. Xüsusilə “Husky” cinsli itin bədənində mənşəyi məlum olmayan yaraların olduğu və heyvanın istidən əziyyət çəkdiyi görüntülərdən aydın olur.

Yaşıllığı, təbiəti və heyvanları ilə ziyarətçiləri cəlb edən, turizm fəaliyyəti çərçivəsində gəlir əldə edən belə bir məkanda heyvanların bu şəraitdə saxlanılması ciddi suallar yaradır. İnsanların istirahət və təbiətlə təmas üçün üz tutduğu bir yerdə heyvanların dar qəfəslərdə, daşlıq sahədə və baxımsız vəziyyətdə saxlanılması qəbuledilməz mənzərədir.

İtlər sadəcə ziyarətçilərin marağını cəlb etmək üçün qəfəslərdə nümayiş etdiriləcək canlılar deyil. Onların hərəkət etmək, uyğun şəraitdə yaşamaq, vaxtında qidalanmaq və baytarlıq yardımı almaq ehtiyacları var.

Turizm məkanlarının fəaliyyəti yalnız ziyarətçilərdən gəlir əldə etməklə məhdudlaşmamalı, ərazidə saxlanılan heyvanların sağlamlığına ilk növbədə məsuliyyətlə yanaşılmalıdır. Heyvanların bu cür şəraitdə saxlanılması ilə bağlı görüntülərin aidiyyəti qurumlar tərəfindən araşdırılması, onların vəziyyətinin qiymətləndirilməsi və lazımi tədbirlərin görülməsi vacibdir.

Nərmin