Klub prezidentinin oğlunun 1 milyonluq maşını yandı – ANBAAN VİDEO

Türkiyənin İstanbul şəhərinin Eyüpsultan rayonunda bazar dəyəri təxminən 20 milyon lirə (880 min manat) olan lüks avtomobil alovlanaraq tamamilə yanıb. Hadisə Hasdal-Kemerburqaz yolunda baş verib və həmin anlar saniyə-saniyə kameraya düşüb.

Avtosfer.az xəbər verir ki, 34-CAA-08 dövlət nömrə nişanlı avtomobili idarə edən sürücü Celal Alaz Adalı maşının mühərrik hissəsindən alov qalxdığını gördükdən sonra avtomobili dərhal yolun kənarında saxlayıb. Sürücü yanğınsöndürən balonla alova müdaxilə etməyə çalışsa da güclü alov avtomobili qısa müddətdə tam bürüyüb.
Əraziyə dərhal xilasedicilər və polis əməkdaşları cəlb olunub. Yanğınsöndürənlərin müdaxiləsindən sonra alov söndürülüb, lakin avtomobil tamamilə yararsız hala düşüb.
Araşdırmalar nəticəsində məlum olub ki, avtomobilin sürücüsü Türkiyənin məşhur iş adamı və "Beşiktaş" klubunun hazırkı prezidenti Serdal Adalının oğlu Celal Alaz Adalıdır. Hadisənin səbəbləri ilə bağlı araşdırmalar davam etdirilir.

Lüks avtomobilin alov içində yandığı anlar hadisə şahidləri tərəfindən mobil telefonla lentə alınıb və sosial mediada geniş yayılıb.

Eltac Zülfüqaroğlu