Maşınların arasından qəfil çıxan qadın az qala avtobusun altında qalacaqdı - REAL VİDEO

Paytaxtın Yusif Səfərov küçəsində piyadanın yol hərəkəti qaydalarını pozması sürücüyə təhlükəli anlar yaşadıb.

Avtosfer.az-ın məlumatına görə, hadisə dekabrın 25-də saat 10:17 radələrində qeydə alınıb. Orta yaşlı qadın işıqforda dayanan avtomobillərin arasından keçərək hərəkətdə olan avtobusun qarşısına çıxıb. Kadrlarda piyadanın yola baxmadan irəlilədiyi və yaxınlaşan avtobusu yalnız son anda fərq etdiyi aydın görünür.

Xoşbəxtlikdən avtobus sürücüsü piyadanın qəfil yoluna çıxmasına baxmayaraq ehtiyatlı davranaraq nəqliyyat vasitəsini vaxtında saxlayıb və mümkün qəzanın qarşısını alıb. Görüntüdə başqa bir qadın piyadanın da avtobusa məhəl qoymadan eyni qayda pozuntusuna yol verdiyi diqqət çəkir.

Qeyd edək ki, piyadaların müəyyən olunmuş keçidlərdən istifadə etməməsi həm onların, həm də sürücülərin həyatı üçün ciddi risk yaradır. Yol hərəkəti qaydalarına əməl etmək hər bir iştirakçının məsuliyyətidir və bir anlıq diqqətsizlik ağır nəticələrə səbəb ola bilər.

Nərmin