Pakistanda bomba yüklü maşın məscidə çırpılıb - Ölənlər var - YENİLƏNİB

Pakistanın şimal-qərbində yerləşən Xayber-Paxtunxva əyalətinin Kohat şəhərində məscid yaxınlığında baş verən atışma zamanı polis qüvvələri tərəfindən üç terrorçu zərərsizləşdirilib.

Avtosfer.az xəbər verir ki, bu barədə "Geo TV" telekanalı məlumat yayıb.

Məlumata görə, cümə namazı qılındığı vaxt içərisində partlayıcı maddələr olan və kamikadze tərəfindən idarə edilən avtomobil "Old Police Lines" kompleksinin qapısına çırpılıb. Nəticədə məscidin divarlarından biri uçub. Daha sonra tərəflər arasında silahlı atışma başlayıb və bu əsnada Xüsusi Polis İdarəsinin binası qarşısında növbəti partlayış qeydə alınıb.

Dəqiqləşdirilmiş məlumatlara əsasən, Kohat şəhərində polis kompleksi və məscid ətrafında törədilən terror hücumları nəticəsində beşi hüquq-mühafizə orqanı əməkdaşı olmaqla, ümumilikdə 16 nəfər həyatını itirib.

***13:54

Pakistanın Xeybər-Paxtunxva vilayətində məsciddə partlayış baş verib. 

Avtosfer.az "Associated Press"ə istinadən xəbər verir ki, hadisə nəticəsində 7 nəfər ölüb, 30 nəfər isə yaralanıb. 

Qeyd olunur ki, məscid Pakistanın şimal-qərbində polis idarələrinin yerləşdiyi binanın yaxınlığında yerləşir.  İlkin məlumatlara görə, partlayıcı maddə ilə yüklənmiş nəqliyyat vasitəsinin Köhnə Polis Xəttlərinə çırpıldığı irəli sürülüb, lakin partlayışın dəqiq səbəbi hələ müəyyən edilməyib.

"Partlayışdan sonra silahlı terrorçularla atışma baş verib", - deyə AP rəsmilərə istinadən yazıb./unikal