Ticarət mərkəzinin parkinqi Bakının mərkəzində tıxac yaradır - VİDEO

Bakının ən sıx hərəkətli ərazilərindən biri olan Nizami küçəsində, “Nərgiz Mall”un altında yerləşən parkinq hər gün ciddi tıxac problemi yaradır.

Avtosfer.az-a məlumat verən sürücülər bildirirlər ki, parkinqin həm giriş, həm də çıxışının eyni nöqtədən Füzuli küçəsi, 49 ünvanından təmin olunması səbəbindən ərazidə mütəmadi olaraq hərəkət dayanır.

Şahidlərin sözlərinə görə, parkinqdə yer olmadıqda giriş tam bağlanır və növbədə dayanan avtomobillər uzun müddət yolun hərəkət hissəsində gözləməli olur. Bu səbəbdən tıxac təkcə parkinqin qarşısında deyil, ətraf küçələrə də yayılır. Xüsusilə İslam Səfərli küçəsinin təmir səbəbindən bağlı olması vəziyyəti daha da ağırlaşdırır.
Videonu çəkən sürücü bildirib ki, həmin gün təxminən 40 dəqiqə tıxacda qalmalı olub:

“Parkinqin qarşısında dayanıb yer boşalmasını gözləyirlər, bu da bütün yolu bağlayır. Nəticədə mərkəzdə hərəkət dayanır. Bu vəziyyət hər gün təkrarlanır, amma heç bir tədbir görülmür”.

Sakinlər və sürücülər aidiyyəti qurumları məsələyə müdaxilə etməyə çağırırlar.

Eltac Zülfüqaroğlu