Yasamalda qanunsuz parklanma: Küçə maneələrlə zəbt edilib - VİDEO - YENİLƏNİB

Paytaxtın Yasamal rayonunun X.Dadaşov küçəsində yolun hərəkət hissəsinin və parklanma yerlərinin süni maneələrlə məhdudlaşdırılması müəyyən edilib.

Avtosfer.az xəbər verir ki, polis əməkdaşları tərəfindən qanunamüvafiq tədbir görülərək əraziyə yerləşdirilən plastik dirəklər götürülüb. Nəticədə nəqliyyat vasitələrinin sərbəst hərəkəti və parklanması təmin olunub.

***

Paytaxtın Yasamal rayonu, Xaqan Dadaşov küçəsində qanunsuz parklanma problemi yaşanır.

Bu barədə izləyicilərdən biri Avtosfer.az-ın “Instagram” səhifəsinə video göndərərək məlumat verib.

Kadrlardan göründüyü kimi, küçədə yerləşən Məşğulluq İdarəsinin və “Etalon” hospitalın qarşısındakı ərazi müxtəlif maneələrlə hasarlanıb. Nəticədə sakinlər və digər sürücülər həmin boş sahələrdən parklanma üçün istifadə edə bilmirlər.

Şikayətçinin sözlərinə görə, ərazi uzun müddətdir bu şəkildə zəbt olunub və demək olar ki, hər gün eyni mənzərə ilə qarşılaşırlar.

Qeyd edək ki, ümumi istifadədə olan yol kənarı ərazilərin qanunsuz şəkildə müxtəlif maneələrlə tutulması digər şəxslərin parklanma imkanlarını məhdudlaşdırır və şəhər infrastrukturundan ümumi istifadəyə maneə yaradır.

Məsələ ilə bağlı aidiyyəti qurumların tədbir görməsi və ərazidə qanunsuz parklanmanın qarşısının alınması gözlənilir.

Nərmin