Almaniyada PUA təhlükəsinə görə 2 təyyarə digər hava limanlarına yönləndirilib

"Leypsiq-Halle" hava limanı yaxınlığında naməlum pilotsuz uçuş aparatı müşahidə edildikdən sonra iki təyyarənin istiqaməti dəyişdirilib.

Avtosfer.az xəbər verir ki, bu barədə "Tagesschau" polisə istinadən məlumat yayıb.

Leypsiq hava limanının yaxınlığında dron aşkar edilib. Bundan sonra aerodromdan iki təyyarə başqa istiqamətə yönləndirilib.

Sonradan məlum olub ki, naməlum uçuş aparatı şəxsi PUA olub və hava limanı üçün təhlükə yaratmayıb. Pilotsuz uçuş aparatı hava limanının yaxınlığında yerləşən Qroskugel qəsəbəsindəki evdə aparılan təmir işlərini izləməli imiş.

Almaniyanın Hava Hərəkətini İdarəetmə Xidmətinin məlumatına görə, belə hadisələr mütəmadi olaraq baş verir. Bu il Leypsiqdə 6, Drezdendə isə 5 dron hava hərəkətini pozub. Təyyarənin bu səbəbdən hərəkət istiqamətini dəyişmək məcburiyyətində qaldığı hallar isə olduqca nadir hallarda baş verir.

Hadisə avqustun 26-da baş versə də, bu barədə ictimaiyyətə yalnız indi məlumat verilib.