Azərbaycanda bu internet provayderləri bağlandı - SİYAHI

Bu ay Azərbaycanda 3 internet operator və provayderinin uçotu ləğv edilib.

Avtosfer.az-ın məlumatına görə, sözügedən şirkətlər “Bynet” MMC, “Tele5" MMC, “Q-net” MMC-dir.

Uçotların ləğv edilmə səbəbi bu operator və provayderlərin fəaliyyətini dayandırımasıdır.

“Bynet” MMC-nin nizamnamə kapitalı 100 manat, qanuni təmsilçisi Rauf Əhmədlidir. Şirkət 2023-cü ilin may ayında uçota alınıb.
 
“Q-net” MMC-nin nizamnamə kapitalı 500 manat, qanuni təmsilçisi Əmrah Kəlbiyevdir. Şirkət ötən ilin dekabr ayında internet operator kimi uçota alınıb.

“Tele5” MMC-nin nizamnamə kapitalı 100 manat, qanuni təmsilçisi isə Azad Dursunovdur. Şirkət 2023-cü ilin noyabr ayında uçota alınıb. Qeyd edək ki, A.Dursunov “Fizza Pay” MMC-nin (fpay.az) direktoru və “BOSS GROUP” MMC-nin təsisçisidir.

Ümumilikdə bu il ərzində Azərbaycanda 15 internet operator və provayderinin uçotu ləğv olunub.

Bunlardan 4-nün uçotunun ləğv edilmə səbəbi hüquqi şəxsin yenidən təşkili olub. Sözügedən şirkətlər “AG Telekom” MMC (“Uninet” MMC-yə qoşulma), “Rahat Telekom” MMC (“AG TELEKOM” MMC-yə qoşulma), “SN Telecom” MMC (“AG Telekom” MMC-yə qoşulma), “Megalink” MMC-dir (“Uninet” MMC-yə qoşulma).
2 şirkətin uçotu uçota alınma üçün təqdim edilmiş sənədlərdə sonralar düzgün olmayan məlumatların aşkar edilməsi səbəbilə ləğv edilib. Bunlar “Bilev Net” MMC və “Premiumnetaz” MMC-dir.

Digər 9 şirkətin isə fəaliyyətini dayandırma səbəbilə uçotu ləğv olunub. “Beeonline” ASC, “Sky Net” MMC, “Vvorld line” MMC, “Portflix” MMC, “Naxtel” MMC, “Bronet” MMC, “Ailəmnet" MMC, “Robonet” MMC, “Bravo technologies” MMC-dir.

Məlumat üçün deyək ki, Azərbaycanda internet operator və provayderlərinin uçota alınmasını və uçotunun ləğvini Rəqəmsal İnkişaf və Nəqliyyat Nazirliyi həyata keçirir. (Plat.az)