Azərbaycanlı sürücülər Gürcüstan gömrüyündə: Sənədləri alınıb, izahatsız SAXLANILIR - FOTO

Gürcüstan ərazisindən tranzit keçən bir qrup azərbaycanlı yük maşını (TIR) sürücüsü günlərlə gömrük məntəqələrində saxlanıldıqlarını, saxlanılmalarının səbəbi barədə isə onlara hər hansı rəsmi izahat verilmədiyini bildirirlər.

Avtosfer.az "Report"a istinadən xəbər verir ki, sürücülər, əsasən, "Sarp" və "Qırmızı Körpü" sərhəd-keçid məntəqələrində, eləcə də Tbilisidəki Gömrük Rəsmiləşdirilməsi Mərkəzində uzun müddətdir gözlədiklərini deyirlər.

Fotoda Teymur Sultanov

Sürücü Teymur Sultanovun sözlərinə görə, Batumiyə qədər hərəkət zamanı heç bir problemlə üzləşməyib. Lakin "Sarp" sərhəd-keçid məntəqəsində avtomobili saxlanılıb, pasportu, sürücülük vəsiqəsi və digər sənədləri götürülüb.

"Artıq 15 gündür gömrük ərazisindəyəm. Bizə, sadəcə, "gözləyin" deyirlər. Səbəbini soruşanda cavab vermirlər. Sənədlərdə, yükdə və ya çəkidə hansı problemin olduğunu heç kim izah etmir", - sürücü bildirib.

Oxşar problemlə üzləşən digər sürücü Eldəniz Məmmədəliyev isə artıq bir aydan çoxdur ki, Gürcüstanda qaldığını deyir. Onun sözlərinə görə, Kutaisidə istehsal olunan və dəmir sənayesində istifadə edilən kimyəvi maddəni Azərbaycana apararkən əvvəlcə gömrükdə üç gün saxlanılıb, daha sonra isə başqa məntəqəyə aparılıb.

"Maşını tamamilə sökdülər, bütün sənədlərimi, pasportumu, telefonumu aldılar. Sonra heç bir izahat vermədən dedilər ki, "gedə bilərsən". Soruşdum, hara gedim, cavab verdilər ki, "bilmirik", - deyə sürücü bildirib.

E.Məmmədəliyev qeyd edib ki, pasportu yalnız 20 gündən sonra qaytarılıb, bu müddətdə isə avtomobili sökülmüş vəziyyətdə qalıb və özü küçədə gecələməyə məcbur olub.

"Əgər problem yükdədirsə, yükü boşaldıb, məni buraxsınlar. Amma heç kim heç nə izah etmir. Hazırda 43-45 gündür Gürcüstandayam", - o vurğulayıb.

Fotodan Bəhadur Əliyev

Sürücülər Bəhadur Əliyev və İman Əliyev də Batumidə gömrük rəsmiləşdirilməsi prosesinin uzanması səbəbindən günlərlə gözlədiklərini bildirirlər. Onların sözlərinə görə, saxlanılmalarının səbəbi ilə bağlı onlara da hər hansı rəsmi izahat verilməyib.

"Artıq neçə gündür Batumidə gözləyirik. Nə vaxt buraxılacağımızı deyən yoxdur. Sadəcə, "gözləyin" cavabı alırıq", - B.Əliyev deyib.

Fotoda İman Əliyev

İ.Əliyev isə söyləyib ki, bütün sənədlər təqdim olunub, amma problem nədən ibarətdir, heç kim izah etmir.

Sürücülərin sözlərinə görə, "Qırmızı Körpü" sərhəd-keçid məntəqəsində də bir neçə Azərbaycan qeydiyyat nişanlı yük avtomobili saxlanılıb. Onların bildirdiyinə görə, gömrük əməkdaşları sonradan Gürcüstanın Ətraf Mühitin Mühafizəsi və Kənd Təsərrüfatı Nazirliyinin xüsusi icazə sənədini tələb ediblər. Sürücülər həmin sənədin təqdim olunduğunu, lakin daha sonra sənədin gürcü dilinə tərcüməsinin istənildiyini bildirirlər.

Yük sahibi Sahib Əliyev isə "Report"un yerli bürosuna açıqlamasında deyib ki, sözügedən icazə sənədi 2023-cü ildə Gürcüstanın Ətraf Mühitin Mühafizəsi və Kənd Təsərrüfatı Nazirliyi tərəfindən verilib və indiyədək eyni sənədlərlə yüzlərlə yük avtomobili Gürcüstan ərazisindən maneəsiz keçib. Onun sözlərinə görə, eyni məhsul bu ilin mart və aprel aylarında, həmçinin ötən ilin oktyabr və dekabr aylarında da heç bir problem olmadan tranzit daşınıb.

"Hesab edirəm ki, hazırkı vəziyyət sənədlərin vaxtında yoxlanılmaması və bürokratik anlaşılmazlıq nəticəsində yaranıb", - S.Əliyev bildirib.

Sürücüləri narahat edən digər məsələ isə gömrük əməkdaşlarının münasibətidir. Onların sözlərinə görə, günlərlə gözləmələrinə baxmayaraq, saxlanılmalarının səbəbi barədə rəsmi məlumat verilmir, sual ünvanladıqları zaman isə bəzi əməkdaşlar kobud davranır, "Get, gözlə" cavabı ilə kifayətlənirlər.

Sürücülər hesab edirlər ki, onlara hansı səbəbdən saxlanıldıqları və problemin aradan qaldırılması üçün hansı sənədlərin və ya prosedurların tələb olunduğu aydın şəkildə izah edilməlidir.

Məsələ ilə bağlı Azərbaycanın Gürcüstandakı səfirliyindən bildirilib ki, hadisə nəzarətə götürülüb. Səfirlikdən qeyd olunub ki, yaranmış vəziyyətlə bağlı Gürcüstan Xarici İşlər Nazirliyinə diplomatik nota ünvanlanıb və məsələ aidiyyəti dövlət qurumları ilə birlikdə araşdırılır.

Qeyd edək ki, bu, Gürcüstan ərazisindən tranzit keçən Azərbaycan yük avtomobillərinin gömrükdə uzun müddət saxlanılması ilk belə hal deyil. Lakin sürücülərin sözlərinə görə, bu dəfə gözləmə müddətinin uzanması, rəsmi izahatın verilməməsi və qeyri-müəyyənlik əvvəlki hallarla müqayisədə daha ciddi narahatlıq yaradır.