Bu ölkədə Prezidentliyə namizəddən GÖZLƏNİLMƏZ ADDIM

Braziliyadan ayrılan keçmiş prezidentliyə namizəd Flavio Bolsonaro ailəsi ilə birlikdə ABŞ-a gəlib.

Avtosfer.az xarici mediaya istinadən xəbər verir ki, hələlik onun ABŞ-a gəlişi ilə bağlı əlavə təfərrüatlar açıqlanmayıb.

Bundan əvvəl Associated Press (AP) mənbələrə istinadən ABŞ Dövlət Departamentinin Flavio Bolsonaroya və ailə üzvlərinə viza verməyi və onların ölkəyə girişinə icazə verməyi planlaşdırdığını xəbər vermişdi.

Dövlət Departamentindəki yüksək vəzifəli mənbə agentliyə bildirib ki, Bolsonaroya və ailəsinə viza veriləcək və onların ABŞ-a daxil olmasına icazə yaradılacaq.

Braziliyanın Folha de S.Paulo qəzeti də ABŞ administrasiyasının Bolsonaronun ölkədən ayrılmasından xəbərdar olduğunu və ona sığınacaq verməyə hazırlaşdığını yazıb. Nəşrin mənbələrindən biri isə ABŞ hakimiyyətinin onun Braziliyadan getməsinin planlaşdırılmasında iştirak etdiyini iddia edib.

Qəzetin əvvəlki məlumatına görə, senator bazar günü keçirilən seçkilərdə məğlub olduqdan, həmçinin məhkəmə orqanları tərəfindən ölkədə qalmaq və Braziliya ilə İtaliya pasportlarını təhvil vermək barədə göstəriş aldıqdan sonra ölkəni tərk etmək qərarına gəlib.

Çərşənbə axşamı Braziliya Ali Məhkəməsinin hakimi Flavio Dino Bolsonaronun seçki kampaniyasının mümkün xarici maliyyələşdirilməsi ilə bağlı araşdırma aparılması barədə qərar verib.

Bundan əlavə, Bolsonaroya qarşı çirkli pulların yuyulması və digər cinayətlərlə bağlı iki cinayət işi açılıb. Braziliya mediasının məlumatına görə, onun Senatdakı səlahiyyət müddəti 2027-ci ilin fevralında başa çatacaq. Bundan sonra onun məhkəmə qarşısına çıxarılması mümkün ola bilər.

Qeyd edək ki, Braziliyada prezident seçkilərinin ikinci turu oktyabrın 25-də keçirilib. Hazırkı prezident Luis İnasio Lula da Silva qalib gəlib. Flavio Bolsonaro isə məğlubiyyətini qəbul etməyib və səsvermə müddətinin uzadılması ilə bağlı qərarın bir sıra pozuntulara səbəb olduğunu iddia edib.