DDLA dənizçilər üçün onlayn təlim imkanı yaratdı - FOTO

Beynəlxalq Dəniz Təşkilatının (BDT) MSC.560(108) nömrəli qətnaməsi rəhbər tutulmaqla, Beynəlxalq Məcəllənin müvafiq cədvəlinə yeni tələb əlavə edilib.

Avtosfer.az xəbər verir ki, sözügedən tələb “Zorakılıq və qısnama hallarının, o cümlədən seksual qısnama, bullinq və seksual hücum hallarının qarşısının alınmasına və onlara cavab tədbirlərinin görülməsinə töhfə vermək” mövzusunu əhatə edir.

Dövlət Dəniz və Liman Agentliyinin (DDLA) həyata keçirdiyi yeniliyə əsasən “Bütün dənizçilər üçün təhlükəsizlik üzrə tanışlıq, ilkin hazırlıq və təlimat” xüsusi hazırlıq şəhadətnaməsi əldə etmiş şəxslər qeyd olunan yeni tələbə uyğun hissə üzrə biliklərini onlayn formatda artırmaq imkanı əldə edirlər. Dənizçilər DDLA-nın yeni istifadəyə verdiyi “My Cabinet” rəqəmsal platformasına daxil olaraq “Təlimlər bölməsi”ndə müvafiq proqramda iştirak edə və təlimi uğurla başa vurduqdan sonra iştirakla bağlı elektron sertifikat əldə edə bilərlər. Həmin sənəd əsasında “Bütün dənizçilər üçün təhlükəsizlik üzrə tanışlıq, ilkin hazırlıq və təlimat” xüsusi hazırlıq şəhadətnaməsini təlimlərdə iştirak olmadan birbaşa imtahanla yeniləmək imkanı yaranacaq.

Bu hazırlıq üzrə ilk dəfə təlim keçən şəxslər isə yalnız DDLA-nın uyğunluq haqqında şəhadətnamə verdiyi təlim-tədris mərkəzlərində təşkil olunan əyani təlimlərdə iştirak etməlidirlər.

Məlumat üçün bildirək ki, cari il ərzində beynəlxalq tələblərə uyğun dənizçilərin bilik və bacarıqlarının artırılması üçün yeni təlimlərin “My Cabinet” platformasına yerləşdirilməsi  nəzərdə tutulur.

Beynəlxalq standartlara uyğun təlimlərin təşkili və rəqəmsal formada istifadəyə verilməsi Azərbaycan dənizçilərinin daxili və beynəlxalq sularda təhlükəsiz, fasiləsiz və beynəlxalq standartlara uyğun şəkildə fəaliyyət göstərməsinə, dəniz mühitində sağlam və təhlükəsiz iş şəraitinin formalaşdırılmasına, eyni zamanda dənizçilik sektorunda idarəetmənin səmərəliliyinin artırılmasına mühüm töhfə verəcək.

Qeyd edək ki, istifadəçilər “My Cabinet” platformasına DDLA-nın rəsmi internet səhifəsində təqdim olunan “Şəxsi kabinet” bölməsi, həmçinin birbaşa keçid linki (https://seafarer.ddla.gov.az) vasitəsilə daxil ola bilərlər.