DDLA-nın əməkdaşları beynəlxalq təlimdə iştirak ediblər - FOTOLAR

Dövlət Dəniz və Liman Agentliyinin əməkdaşları Portuqaliyanın paytaxtı Lissabon şəhərində Avropa Dəniz Təhlükəsizliyi Agentliyinin (EMSA) təşkil etdiyi “Dəniz auditorları üçün ümumi əsas tədris proqramı kursu” adlı  beynəlxalq təlim proqramında iştirak ediblər. 

Avtosfer.az xəbər verir ki, beş gün davam edən təlim proqramı dəniz nəqliyyatı sahəsində audit fəaliyyəti üzrə vahid metodoloji yanaşmanın formalaşdırılması məqsədi daşıyıb. 

Beynəlxalq təlim çərçivəsində audit prinsipləri üzrə ISO standartının tətbiqi, təsnifat cəmiyyətlərinin audit mexanizmləri, həmçinin Gəmi və Liman Vasitələrinin Mühafizəsi, Əmniyyətli İdarəetmə haqqında beynəlxalq məcəllələrin tələblərinə uyğun olaraq həyata keçirilən auditlər barədə fikir mübadiləsi aparılıb. 

Sonda Agentliyin nümayəndələri proqramı uğurla başa vuraraq sertifikatlarla təltif olunublar. 

Qeyd edək ki, təlimdə Agentliyin  Təsnifat Cəmiyyətləri ilə iş şöbəsinin müdiri İbrahim Salmanov, Gəmi qeydiyyatı və sənədləri şöbəsinin müdiri Cavidan Qasımlı və Limanlar və dəniz əməliyyatları bazaları ilə iş şöbəsinin müdiri vəzifəsini icra edən Pərviz Abbasov iştirak edib.