Əkrəm Tağıyev vəfat etdi - FOTO

Azərbaycan Rəssamlıq Akademiyasının "Rəsm" kafedrasının baş müəllimi, rəssam Əkrəm Tağıyev vəfat edib.

Avtosfer.az xəbər verir ki, Əkrəm Tağıyev yarım əsrə yaxın pedaqoji və yaradıcılıq fəaliyyəti ilə Azərbaycan təsviri sənətinin inkişafına, gənc rəssam nəslinin yetişdirilməsinə mühüm töhfələr verib.

1974-cü ildə Tbilisi Dövlət Rəssamlıq Akademiyasını bitirən sənətkar uzun illər ərzində ali və orta ixtisas təhsili müəssisələrində rəsm fənnini tədris edib. 1995-ci ildən Azərbaycan Dövlət Mədəniyyət və İncəsənət Universitetinin "Rəsm" kafedrasında, 2003-cü ildən isə Azərbaycan Rəssamlıq Akademiyasında pedaqoji fəaliyyətini davam etdirib.

Əkrəm Tağıyevin yaradıcılığı əsasən rəngkarlıq və qrafika sahələrini əhatə edib. Rəssamın əsərlərində mənzərə, portret və natürmort janrlarına geniş yer verilib. "Abşeron", "Dəniz mənzərəsi", "Dəniz və qadın", "Güzgü qarşısında", "Xəzri", "Qobustan daşları", "Avtoportret", "Bakı gecəsi" kimi əsərləri onun yaradıcılıq irsinin mühüm nümunələrindəndir.

Sənətkar müxtəlif respublika və beynəlxalq sərgilərdə iştirak edib və uğur qazanıb.

Əkrəm Tağıyev Azərbaycan Rəssamlıq Akademiyasında uzun illər ərzində müəllim kimi fəaliyyət göstərərək öz bilik və təcrübəsini tələbələri ilə bölüşüb, onların peşəkar rəssam kimi formalaşmasına yaxından iştirak edib. Onun pedaqoji fəaliyyəti və sənət irsi Akademiyanın yaddaşında özünəməxsus iz buraxıb.