İçərişəhərdə keçirilən konsert müzakirələr yaratdı

Bu günlərdə İçərişəhərdə keçirilən konsert proqramı sosial şəbəkələrdə müzakirələrə səbəb olub. 

Avtosfer.az xəbər verir ki, bəzi izləyicilər paylaşımlarında ziyarətə bağlı olan türbələrdə musiqiçilərin konsert verməsini qınayıb.

Onlar Şirvanşahların dövründə saray alimi olmuş Seyid Yəhya Bakuvi və digər övliyaların türbələrinin ətrafında belə tədbirlərin keçirilməsini hörmətsizlik kimi qəbul edirlər. Vətəndaşlar aidiyyəti qurumların həmin övliyaları tanıtmaq əvəzinə, türbələrdə şou təşkil etməyini qınayıblar. 

Məsələ ilə bağlı İçərişəhər Qoruq İdarəsinin Mətbuat xidməti ilə əlaqə saxladıq. Xidmətin baş məsləhətçisi Səfayə Əhmədova saytımıza açıqlamasında bildirib ki, Bakuvi Türbəsi ətrafında keçirilən musiqi proqramı ilə bağlı səslənən fikirləri anlayışla qarşılayırlar: “Tarixi məkanlara olan həssaslıq bizim üçün hər zaman önəmlidir. Eyni zamanda, bu abidələrin mədəni həyatın bir parçası olaraq yaşadılması və tanıdılması da vacibdir. Xüsusən də gənc nəslə. Sözügedən tədbir zamanı heç bir yüksək səsləndirici avadanlıqdan istifadə olunmayıb, qeyri-etik rəqs və ya davranış nümayiş etdirilməyib. Proqram sakit, estetik və mədəni şəkildə təqdim olunub.

Şirvanşahlar Sarayı Kompleksi və ümumilikdə İçərişəhər bu kimi mədəni layihələrə dəfələrlə ev sahibliyi edib. Gələcəkdə də bu cür layihələrin həyata keçirilməsi zamanı ictimai rəylər və həssaslıqlar diqqətlə nəzərə alınacaq. İçərişəhərdə keçirilən tədbirlərə göstərdiyiniz diqqət və münasibətə görə təşəkkürümüzü bildiririk”.

Qeyd edək ki, türbə görkəmli müsəlman alimlərinin, hökmdar, hökmdar ailəsi üzvlərinin və digər tarixi şəxsiyyətlərin qəbirləri üzərində ucaldılan, üzəri xüsusi qübbələrlə örtülmüş tikiliyə deyilir.