Metronun "Memar Əcəmi" stansiyasının girişində təhlükəli vəziyyət yaranıb? - RƏSMİ AÇIQLAMA

Sosial şəbəkələrdə metronun "Memar Əcəmi" stansiyasının giriş hissəsində divar üçün nəzərdə tutulan mərmər örtüklərin döşəməyə vurulması barədə görüntülər paylaşılıb.

Avtosfer.az oxu.az-a istinadən xəbər verir ki, həmin örtüklərin səthinin sürüşkən olduğu üçün piyadalara təhlükə yaratdığı bildirilir.

Məsələ ilə bağlı "Bakı Metropoliteni" Qapalı Səhmdar Cəmiyyətinin mətbuat xidmətinin rəhbəri Bəxtiyar Məmmədov bildirib ki, "Memar Əcəmi" stansiyasının hazırda təmir-bərpa işi aparılan keçidində qranitin döşənməsi sərnişin təhlükəsizliyi tələbləri nəzərə alınmaqla aparılır:

"Döşəmə örtüyünün açıq hava ilə təmas olan hissələri ehtiyat tədbiri kimi xüsusi qaydada cilalanır. Bildiririk ki, stansiyanın həmin çıxışı sərnişinlərin gediş-gəlişi üçün bağlıdır.

Ümumiyyətlə, bütün təmir işləri sərnişin təhlükəsizliyi tələblərinə uyğun aparılır. Görülən tədbirlərdən savayı, norma və qaydaların tələbinə uyğun təmir-bərpa prosesinin son mərhələsində də digər texniki tədbirlər görüləcək".