"Orta dəhlizin potensialını öyrənməkdə maraqlıyıq" - Nazir

Yaponiya Orta dəhliz kimi tanınan Transxəzər Beynəlxalq Nəqliyyat Marşrutunun (TBNM) potensialını öyrənməkdə maraqlıdır. 

Avtosfer.az “Report”a istinadən xəbər verir ki, bunu Qazaxıstanın Yaponiyadakı səfiri Erlan Baudarbek-Kojatayev Yaponiyanın torpaq, infrastruktur, nəqliyyat və turizm naziri Hiromasa Nakano ilə görüşdə bildirib. 

Qazaxıstanın Xarici İşlər Nazirliyinin yaydığı məlumata görə, görüşdə Orta Dəhlizin inkişaf perspektivləri müzakirə edilib. Diplomat Asiya ilə Avropa arasında əsas multimodal tranzit marşrutlarından biri olan Orta Dəhlizin mövcud vəziyyəti və inkişaf perspektivlərindən danışıb.

Nazir H.Nakano TBNM-in beynəlxalq ticarətdə və regional iqtisadi inkişafda artan rolunu qeyd edib. 

"Bu kontekstdə Orta Dəhliz çərçivəsində infrastrukturun yaradılması və ötürücülük qabiliyyətinin artırılması, idarəetmə səmərəliliyinin yüksəldilməsi, həmçinin logistika və gömrük xidmətlərinin təkmilləşdirilməsi məsələlərinə toxunulub", - məlumatda qeyd olunub.

Səfir, həmçinin nazirə Aktau və Kurık limanları vasitəsilə Yaponiyadan Avropaya tranzit konteyner daşımalarının həyata keçirilməsində və Qazaxıstanda logistika mərkəzlərinin yaradılmasında maraqlı olan Yaponiyanın nəqliyyat-logistika şirkətləri ilə görüşlərin nəticələri barədə məlumat verib.

Bundan əlavə, tərəflər Qazaxıstan və Yaponiya arasında birbaşa aviareysin açılması imkanını müzakirə edərək, bunun qarşılıqlı işgüzar əlaqələrinin möhkəmlənməsinə töhfə verəcəyini qeyd ediblər.

Orta Dəhliz Qazaxıstan, Xəzər dənizi, Azərbaycan və Gürcüstan vasitəsilə Çin və Avropa ölkələrini birləşdirən beynəlxalq nəqliyyat dəhlizidir.