Qazaxıstan yenidən Bakı-Tbilisi-Ceyhan kəmərindən istifadə edə bilər

Ukraynanın pilotsuz təyyarəsinin Rusiyada Xəzər Boru Kəməri Konsorsiumunun (CPC) infrastrukturuna hücumundan sonra Qazaxıstan neft ixracı üçün bütün mümkün variantları öyrənir və həyata keçirir.

Avtosfer.az xəbər verir ki, bu barədə Qazaxıstan Energetika Nazirliyi açıqlayıb. 

"Hazırda Qazaxıstan Respublikasının Energetika Nazirliyi hasilatçı şirkətlərlə birlikdə neft həcmlərinin yenidən bölüşdürülməsi üzrə əməliyyat işləri aparır. Alternativ ixrac marşrutlarından istifadə aktivləşdirilib.

Bütün mümkün nəqliyyat variantları öyrənilir və tətbiq edilir. Logistika qəbul edən tərəflərin hazırkı texniki imkanlarına çevik şəkildə uyğunlaşdırılır", - idarədən bildirilib. 

Xatırladaq ki, noyabrın 29-da Ukrayna pilotsuz təyyarələri Xəzər Boru Kəməri Konsorsiumunun Krasnodar diyarındakı dəniz terminalının lövbərlərindən birinə hücum edib. Qazaxıstan beynəlxalq enerji təhlükəsizliyi infrastrukturunun bir hissəsi olan obyektlərə hücumların qəbuledilməz olduğunu bildirib. Ölkənin Energetika Nazirliyindən bildirilib ki, mənfi nəticələrin minimuma endirilməsi və hasilat göstəricilərinin saxlanılması məqsədilə ixrac olunan neft həcmlərinin alternativ marşrutlarla yönləndirilməsi proqramı işə salınıb.

Qazaxıstan Xarici İşlər Nazirliyi noyabrın 30-da konsorsiumun infrastrukturuna hücuma etiraz edərək, bunu mülki obyektə qarşı təcavüz aktı kimi qiymətləndirib və bunu Astananın Kiyevlə münasibətlərinə xələl gətirən hərəkət kimi qiymətləndirdiyini vurğulayıb. Ukrayna Xarici İşlər Nazirliyi daha sonra bəyan edib ki, Qazaxıstanın CPC (Xəzər Boru Kəməri Konsorsiumu) infrastrukturu ilə bağlı narahatlığını nəzərə alıb.

Qazaxıstan üçün alternativ neft tədarükü marşrutu Bakı-Tbilisi-Ceyhan boru kəməri ola bilər, lakin onun vasitəsilə xam neftin yüklənməsi Xəzər dənizi vasitəsilə həyata keçirilən tankerlə yüklənməni tələb edir. 2024-cü ildə bu kəmərlə tranzit 1,5 milyon ton neft təşkil edib və Astana tədarükləri artırmaq niyyətində olduğunu bəyan edib.

2024-cü ildə CPC vasitəsilə tədarükün həcmi 63 milyon ton təşkil edib ki, bunun da 70%-dən çoxu Qazaxıstanda neft hasil edən xarici ixracatçıların payına düşüb./unikal