Rusiyada ailələr YOXA ÇIXIR

Rusiyanın Krasnoyarsk diyarında daha bir ailənin müəmmalı şəkildə itkin düşməsi ilə bağlı axtarışlar davam edir.
Avtosfer.az xarici mediaya istinadən xəbər verir ki, ilkin məlumata görə, 43 və 45 yaşlı ər-arvad iyunun 20-də İrbeysko-Sayanski rayonunda yerləşən Aqul çayında raftinqə çıxıb. Həmin vaxtdan etibarən onlarla əlaqə kəsilib.

Xilasedicilər doqquz gündür genişmiqyaslı axtarış aparırlar. Bildirilir ki, exolot cihazlarının köməyi ilə çay sahili boyunca 58 kilometr məsafə və təxminən 40 min kvadratmetr ərazi yoxlanılıb. Lakin nə onların qayığına, nə də şəxsi əşyalarına rast gəlinib. Axtarış-xilasetmə əməliyyatları davam etdirilir.

Məlumata görə, hadisə bir müddət əvvəl Usoltsev ailəsinin sirli şəkildə yoxa çıxdığı ərazidən təxminən 200 kilometr məsafədə baş verib. Həmin hadisədə meşədə gəzintiyə çıxan üç nəfərlik ailənin də izinə indiyədək rast gəlinməyib.

Yerli KİV-lər qeyd edir ki, son illərdə bölgədə bir neçə oxşar itkin düşmə hadisəsi qeydə alınıb. İddialara görə, son bir neçə ildə azı yeddi nəfər bu ərazidə itkin düşərək geri qayıtmayıb. Onların arasında keçmiş xüsusi təyinatlı hərbçi Viktor Potaenkov, idman oriyentiri üzrə mütəxəssis Vladimir Şatıgin və turist Vladimir Raşçepkin də var.

Yerli sakinlər arasında ərazi qeyri-rəsmi olaraq "Manskaya Ölüm Döngəsi" kimi tanınır. Bununla belə, bu ərazinin "anomal zona" olması ilə bağlı iddialar rəsmi qurumlar tərəfindən təsdiqlənməyib və elmi sübutlarla əsaslandırılmayıb.

Bundan əlavə, yerli mediada yayılan məlumata görə, dünən Durnaya kanalında bir nəfər boğularaq ölüb. Lakin bu hadisənin itkin düşmə halları ilə əlaqəli olub-olmadığı məlum deyil./ajans.az