Viza üçün XİN-nə müraciət edən iraqlı qara siyahıda imiş - FOTO - YENİLƏNİB

"Aqeel Hamad Ali adlı şəxs ölkədə qara siyahıdadır".

Bu barədə Xarici İşlər Nazirliyinin mətbuat katibi Ayxan Hacızadə cavab olaraq bildirib.

Qeyd edib ki, sözügedən şəxsin yazdıqları həqiqəti əks etdirmir. 

***

İraq vətəndaşı Aqeel Hamad Ali Azərbaycan Xarici İşlər Nazirliyindən şikayətçidir.

Avtosfer.az xəbər verir ki, sözügedən şəxs turist kimi Azərbaycana səfər etmək istəyir. İddia edir ki, nazirlikdən onun işi 25 gündən çoxdur ki, gecikdirilir. 

"Mən gözəl ölkənizə turist kimi səfər etmək istəyirəm. Buna görə də viza üçün müraciət etdim. Ərizəmi rəsmi "Gate Way" şirkəti vasitəsilə 25 gün əvvəl təqdim etmişəm və təqdim etdiyimi təsdiq edən rəsmi qəbz də var. “Gate Way” ilə əlaqə saxladığımda mənə bildirdilər ki, gecikmə səfirliklə bağlıdır. Bu arada, başqa şirkətdən keçərək müraciət edən şəxslər vizalarını cəmi 5 gün ərzində alırlar. Hörmətli Xarici İşlər Nazirliyindən xahiş edirəm ki, bu gecikməni araşdırsın və vizanın verilməsini sürətləndirsin ki, mən sizin gözəl ölkənizə turist kimi səfər edə bilim" deyə İraq vətəndaşı bildirib. 

Qeyd edək ki,  "Gate Way" şirkəti Xarici İşlər Nazirliyinin vəzifəli məmurlarından birinə məxsusdur.