Bakının mərkəzində sürücüləri çətin vəziyyətə salan yolayrıcı – VİDEO

Bakının mərkəzində bəzi yolayrıclarında nişanlanma və hərəkətin təşkili sürücülər üçün ciddi çətinlik yaradır. Xüsusilə pik saatlarda belə ərazilərdə qəza riski də artır.

Avtosfer.az xəbər verir ki, qəza əleyhinə kursların məşqçisi Aqil Rəhimov sosial şəbəkədə paylaşdığı görüntüdə bu məsələyə diqqət çəkib.

Mütəxəssis bildirib ki, “İçərişəhər” metrostansiyası istiqamətindən Filarmoniya bağına, oradan isə aşağı Azneft dairəsinə hərəkət edən sürücülər üçün yolayrıcında mövcud “STOP” nişanı problem yaradır. Onun sözlərinə görə, nişanın yerləşdiyi nöqtədən sürücü soldan gələn nəqliyyat vasitələrini tam görə bilmir.

Aqil Rəhimov hesab edir ki, “STOP” xəttinin daha irəli, yol şəraitinin imkan verdiyi nöqtədə yerləşdirilməsi sürücünün digər istiqamətlərdən gələn avtomobilləri daha yaxşı görməsinə şərait yarada bilər.

“Bu yolayrıcından qaydaları pozmadan keçmək çox çətindir. Axşam saatlarında, xüsusilə pik vaxtlarda vəziyyət daha da ağırlaşır. Sürücü bir tərəfdən aşağıdan gələn avtomobilləri, digər tərəfdən isə yuxarıdan gələn nəqliyyat vasitələrini nəzərə almalıdır”, – deyə ekspert bildirib.

Problemin həlli üçün yolayrıcında svetoforun quraşdırılması və ya hərəkət istiqamətlərindən birində “STOP” və ya “Yol ver” nişanının tətbiqi variantları nəzərdən keçirilə bilər. Mövcud vəziyyət sürücüləri qayda pozuntusuna sövq etməklə yanaşı, qəza şəraitinin yaranmasına da səbəb olur.

Aqil Rəhimov aidiyyəti qurumları yolayrıcındakı hərəkətin təşkilinə yenidən baxmağa və sürücülər üçün daha təhlükəsiz həll tətbiq etməyə çağırıb.

Eltac Zülfüqaroğlu