Bu zolaqlarda hərəkət edərkən diqqətli olun – MÜTƏXƏSSİS – VİDEO

Yollarda tətbiq edilən əyri zolaqlar bəzi hallarda nəqliyyat axınının tənzimlənməsinə xidmət etsə də, sürücülər üçün əlavə risklər də yarada bilir.

Avtosfer.az xəbər verir ki, bu barədə qəza əleyhinə kursların məşqçisi Aqil Rəhimov məlumat verib.

Onun sözlərinə görə, əyri zolaqlarda hərəkət edən sürücülər manevr zamanı arxadan gələn nəqliyyat vasitələrini nəzərə almadıqda yol-nəqliyyat hadisəsinin baş vermə ehtimalı artır.

Sürücü sağ və ya sol istiqamətdə hərəkət edərkən yalnız qarşıdakı nəqliyyat vasitələrinə deyil, arxadan yaxınlaşan avtomobillərə də diqqət yetirməlidir:

“Əyri zolaqların əsas təhlükəsi ondan ibarətdir ki, sürücü zolağın istiqamətinə uyğun olaraq sağa və ya sola hərəkət edərkən arxadan düz istiqamətdə gələn avtomobillə toqquşa bilər. Sağa yönələn zaman sağ zolaqdan, sola yönələn zaman isə sol zolaqdan gələn nəqliyyat vasitəsi ilə qəza riski yaranır. Təcrübədə belə hadisələr artıq bir neçə dəfə qeydə alınıb”.

Mütəxəssis qeyd edib ki, bəzi sürücülər öz zolaqları ilə hərəkət etdiklərini düşünərək güzgülərdən istifadə etməyə ehtiyac duymurlar. Halbuki hər hansı istiqamət dəyişikliyi zamanı güzgülərə nəzarət etmək vacibdir.

Sürücülər əyri zolaqlarda hərəkət edərkən manevrdən əvvəl arxa və yan görünüş güzgülərini yoxlamalı, arxadan yüksək sürətlə yaxınlaşan avtomobil olduqda ona yol verməli və yalnız bundan sonra hərəkəti davam etdirməlidirlər.

Aqil Rəhimov hesab edir ki, belə ərazilərdə diqqətli olmaq, məsafə saxlamaq və güzgülərdən düzgün istifadə etmək yol-nəqliyyat hadisələrinin qarşısının alınmasında mühüm rol oynayır. O, sürücüləri zolaq dəyişmə və istiqamətlənmə zamanı daha ehtiyatlı olmağa çağırıb.

Eltac Zülfüqaroğlu