Maşında bu sistem işlək olmasa, qəza riskləri artır – SÜRÜCÜLƏRƏ XƏBƏRDARLIQ

Dinamik sabitliyə nəzarət (DSC) avtomobillərdə təhlükəsizliyi artıran vacib sistemlərdəndir. Bu sistem xüsusilə döngələrdə və sürüşkən yollarda nəqliyyat vasitəsinin daha dayanıqlı hərəkətini təmin edir. Avtomobilin idarəetməsini və sabitliyini qorumağa kömək edən DSC sistemi müasir avtomobillərdə geniş şəkildə tətbiq edilir.

Avtosfer.az xəbər verir ki, DSC sistemi avtomobilin sürüşmə ehtimalını müəyyən edərək təkərlərə ötürülən əyləc gücünü tənzimləyir. Avtomobil sürüşməyə başlayırsa, sistem müdaxilə edərək sabitliyi bərpa edir. Bu, xüsusilə pis hava şəraitində və ya sərt döngələrdə qəza riskini minimuma endirir.
Ekspertlər bildirirlər ki, DSC sistemi sükanın dönmə bucağını, avtomobilin sürətini və təkərlərin fırlanma sürətini daim analiz edərək lazımi tədbirlər görür. Sürücülər DSC sisteminin aktiv olduğunu avtomobil panelindəki xüsusi işıq siqnalı vasitəsilə görə bilərlər. İşıq davamlı yanırsa, sistemin nasazlığını göstərir və bu halda servisə müraciət edilməlidir.

Avtomobil sahiblərinə DSC sisteminin düzgün işləməsini yoxlamaq üçün avtomobilin texniki xidmət qaydalarına riayət etmələri tövsiyə olunur. Əgər sistemin işində problemlər müşahidə olunarsa, mütəxəssislərin köməyi ilə nasazlıq aradan qaldırılmalıdır. Təhlükəsiz sürüş üçün DSC və digər stabilizasiya sistemlərinin işlək vəziyyətdə olması vacibdir.

Ekspertləri bildirirlər ki, DSC sisteminin fəaliyyəti təkcə əyləc sisteminin işinə deyil, həm də avtomobilin ümumi idarəetmə funksiyalarına təsir göstərir. Buna görə də, sürücülərin avtomobillərinin stabilizasiya sistemlərinin texniki baxışını vaxtında etdirmələri tövsiyə olunur.

Eltac Zülfüqaroğlu